ग्रेसफुल म्हातारपण म्हणजे शरीराने मस्त चालते-फिरते आणि मनाच्या उत्साहाने पळणारे तारुण्य. शरीराने फिट कसे राहायचे याचे ज्ञान सहज उपलब्ध . जिम करा, उत्तम योगा शिकवणारी तरुण शिक्षिका शोधा किंवा जॉगिंग ट्रॅकवर कोणाच्या तरी मागे पळा (पुढे पळायचे वय ओसरलं !), न बुडता स्विमिंग करा, झेपेल एवढं सकस पण कमी खा आणि नीट झोप घ्या (झोपे पूर्वी ‘नीट’ टाळा!), गणित तसं सोपं.

मनाला सदाबहार तरुण ठेवणे अवघड आणि आपण मनाने म्हातारे झालो हे समजणे त्यापेक्षा अवघड. एकदा आरशा समोर उभे राहून स्वतःला प्रश्न विचारा - पोरंबाळं आपल्याला टाळतात का ? बायको तोंडदेखलं ‘हो’ म्हणून तिला पाहीजे तेच करते का? आपण घरात नसलो तर कुटुंब जास्त खुश असतं का? तुम्ही घरात असताना कामवाल्या बाईच्या कपाळावर आठ्या पडतात का? पोरांचे मित्र-मैत्रिणी तुम्हाला कोणत्या टोपण नावाने हाक मारतात? ऑफिसमध्ये आपण डबा एकटेच खातो का? लोक आपल्याला जरुरी एवढीच माहिती देतात का? ऑफिस मधल्या किंवा घरगुती समारंभात आपल्याला आमंत्रण देणे चुकून विसरल्या सारखे करून मुद्दाम टाळले जाते का? आपण तेच-तेच विषय तुटेपर्यंत ताणतो का ? व्हाट्सअँप ग्रुप मधून आपण एक्सिट झालो तर ५० अंगठे आणि ५१ लव येतात का ? उत्तर ‘हो’ असेल तर तुम्ही ‘गॉन केस’ आहात, स्वतःला सुधारायला आणि आवरायला आत्ताच शिका किंवा उरलेल्या आयुष्याचा कचरा करायला तयार रहा.

आमचा एक डॉक्टर मित्र सांगतो मानसिक आणि शारीरिक रिकामपण वाईट. म्हणजे तुम्ही तुमच्या हातातली कामधंदे सोडून आराम करायला घरी बसलात तर लवकरच तुमचे हात-पाय बसून तुम्ही उचलले जाण्याची शक्यता जास्त. पटण्यासारखं आहे, तो नेहमीच अशा केसेस बघत असेल. हातात स्वतःला शारीरिक आणि मानसिक दृष्ट्या गुंतवून ठेवणारा प्लॅन-बी नसेल तर फक्त कंटाळा आला, आता आराम करायचा या सबबीवर हातातल्या कामातून रिटायर्ड होणं फार शहाणपणाचं नाही. कर्म करत रहा, त्यासाठी राजकारण्यांचा आदर्श आणि उत्साह घ्या, ऐंशी पार झाले तरी गुलाबी स्वप्न बघत राहा. कामात नसाल तर कामातून जाल हा मंत्र लक्षात ठेवा. आमचा एक ज्योतिषी मित्र सांगतो, प्रत्येकाला सुदृढ जगण्यासाठी एक व्यसन पाहिजे. व्यसनाला पैसा, प्रतिष्ठा, छंद काहीही चालेल. पण त्या व्यसनाचे पॅशन पाहीजे म्हणजे म्हातारपण आनंदात जाते. हे पण बरोबरच.

भो या सगळ्याचा मतितार्थ इतकाच - आपण सगळे वारकरी आहोत. कर्माचा टाळ आणि मानसिक संतुलनाच्या चिपळ्या वाजवत आनंदाने आणि धडधाकटपणे पंढरीकडे धावत राहा. मध्येच गाड्याचं चाक आपल्याच हाताने पंचर केले तर  जवळच्या गटार गंगेत विसर्जन नक्की. तुम्ही समजदार आहात. निर्णय तुमचा. बाकी फुकटचे सल्ले देण्याची वेळ आणि शब्दमर्यादा आता संपली आहे. नेहमी सारखेच, जय हो!