वेळेचे व्यवस्थापन - आजची गरज

याचबरोबर आणखीन एक सवय लावणं खूप महत्त्वाचं आहे, ती म्हणजे वस्तू योग्य ठिकाणी ठेवणे किंवा वस्तू जिथून घेतली तेथेच परत ठेवणे. ही सवय वेळेच्या व्यवस्थापनाबरोबर जर एखाद्याने आत्मसात केली, तर त्याचे प्रचंड फायदे आहेत, जसं की तुम्हाला ती गोष्ट शोधण्यातला वेळ वाचणे, तुमचा ताण कमी होणे, इत्यादी. मित्रांनो, या सगळ्या गोष्टींचा मला माझ्या वैयक्तिक व व्यावसायिक जीवनात प्रचंड फायदा झाला आहे.

मैत्र अंकासाठी हा विषय लिहितो आहे, तर माझ्या पन्नाशी पार झालेल्या मित्रांना काही गोष्टी सांगाव्या असं वाटतं, साधारण तीन-चार वर्षांपूर्वी कोरोना नावाचं भयानक वादळ आपल्या सगळ्यांच्याच आयुष्यात येऊन गेलं आणि त्याने आपल्याला एक गोष्ट खूप चांगल्या रीतीने शिकवली, ती म्हणजे तुमचं आरोग्य चांगलं नसेल, तर बाकी सगळ्या गोष्टी आयुष्यात व्यर्थ आहेत आणि हे आपण सगळ्यांनी अनुभवलं आणि पाहिलं सुद्धा, त्यामुळे मित्रांनो, तुमच्या आरोग्याला प्रथम प्राधान्य द्या व मी वर सांगितल्याप्रमाणे एक तास रोज व्यायामासाठी निश्चित काढा, तसेच आपल्या आवडीच्या गोष्टी आणि छंद यांच्यासाठी पण वेळ राखून ठेवा आणि हे तेव्हाच शक्य आहे, जेव्हा तुम्ही तुमच्या कामाचे तास लवचिक ठेवाल आणि कामाचा स्वतःला ओव्हरलोड होणार नाही याची काळजी घ्याल आणि तसं पाहिलं, तर हे फारसं अवघड नाहीये, कारण आयुष्याच्या ह्या टप्प्यावर प्रत्येकावरच कौटुंबिक आणि इतर जबाबदारीचं ओझं हे बऱ्यापैकी कमी झालेलं असतं, फक्त आपल्याला एवढेच कळणं महत्त्वाचं आहे, ते आपण कुठे थांबायचं आहे. शेवटी इतकंच सांगेन की वेळेचे व्यवस्थापन जर तुम्हाला तुमच्या आयुष्यात जमलं, तर तुम्हाला तुमचे ध्येय गाठण्यासाठी आणि यशस्वी व्यक्ती होण्यासाठी कोणीही थांबवू शकत नाही.