विचारांचे बीज आणि आजारांचे पीक

अजून एक अनुभव म्हणजे अचानक कमी वयात घरातील कर्ता व्यक्ती, कदाचित वडील जाणे आणि त्यामुळे सर्व कुटुंबाची जबाबदारी आपल्याकडे येणे किंवा वैचारिक दृष्ट्या ती आपल्यावर आली आहे असा समज होणे स्वाभाविक. या विचारातून पुढील वाटचाल सुरू होते आणि त्याचा परिणाम कायम 'खानदान दुःखी' सुरू होणे.

अचानक जॉब जाणे किंवा मोठा आर्थिक तोटा होणे आणि आता पुढे कसे काय होणार याची चिंता सतावणे, याचा परिणाम आपल्या बॅकबोनवर होऊन कमरेचा आजार शरीरावर होऊन कायमची पाठ किंवा कंबरदुखीचा आजार सुरू होतो.

अशीच परिस्थिती बरेच वेळा घरात आलेल्या नववधूवर म्हणजे सुनेवर झालेली दिसते, कारण ती एका वेगळ्या विश्वातून नवीन घरात येते आणि सासरच्या परंपरांचा एवढा भडिमार होतो की अचानक तिच्या मनात म्हणजेच विचारावर भावनिक दडपण येऊन तिला फ्रोझन शोल्डरसारखा आजार बळावतो, कारण तिला सर्व काही तिच्या इच्छेनुसार कामे करायची सवय असते, पण तिला तो फ्रीडम मिळत नाही आणि जे करायची इच्छा नसते ते तिला बळजबरीने करावे लागते. म्हणजेच याचा अर्थ असा की तिला तिच्या मूव्हमेंटवर बंध घालावा लागतो आणि त्याचा तिच्या शरीरावर परिणाम होतो.

बघा ना, जेवढे काही स्पेशलिस्ट डॉक्टर असतात ते खूप यशस्वी देखील असतात आणि त्यातून ते बरेच पैसे देखील कमावतात, परंतु सतत तोच तोच विचार करून आणि सतत त्याच रोग्यांमध्ये राहून तोच विचार करून बरेच वेळा त्याच आजाराने ते गेलेले असतात. उदाहरणच घ्यायचे तर डॉ. नितू माणके, यांच्याबद्दल काय लिहिणार, ते सर्वांनाच परिचित आहे.

मनात एखाद्या व्यक्तीबद्दल असलेली अढी ही आपल्या शरीरात एखाद्या गाठीचे अस्तित्व निर्माण करते, जसे की ट्यूमर किंवा रक्त वाहिनीमध्ये गाठ निर्माण होणे. मग ऑपरेशन किंवा एंजियोग्राफी करून ती काढावी लागते.

बरेच वेळा ज्यांना पैसे खर्च करताना खूप त्रास होतो म्हणजे पैसे असतात त्यांच्याकडे पण देताना मनापासून खर्च न करता अगदीच जीवावर आल्यासारखे होते, अशा लोकांना बद्धकोष्ठतेचा किंवा पाइल्सचा त्रास होतो आणि या मागचा विचार हा असतो की मी माझ्या स्वतःचे पैसे का खर्च करू? म्हणजेच की ते जाऊ न देणे हीच भावना आणि त्या मागील असलेला विचार वरील आजार शरीरात प्रवेश करतात. बरेच जण हे याच विचारांमुळे स्किन डिसीजला देखील सामोरे जातात…

तसेच सर्व काही सुरळीत चालू आहे, घर, गाडी, मुलांची लाइन लागली आहे अशा वेळी बरेचदा जीवनातील गोडवा चालला जातो आणि मग तो शुगरच्या स्वरूपात शरीरात प्रवेश करून आपण कायमचे डायबेटिक होऊन बसतो. भविष्याचे येणारे प्रश्न किंवा चिंता ही बीपीच्या म्हणजेच ब्लड प्रेशरच्या स्वरूपात येते आणि कायमची गोळी पाठीमागे लागते.

हे आणि असे सर्व प्रकारचे आजार हे इथे मी मांडू शकत नाही कारण शब्दांची मर्यादा आहे, म्हणून तुम्ही माझ्याशी नक्कीच संपर्क करू शकता. माझ्या अनुभवातून जे शक्य आहे तेवढे मार्गदर्शन करण्याचा प्रयत्न जरूर करणार आणि हो, सध्या तुमचे चालू असलेले उपचार आणि औषध हे चालू ठेवा, पण मी खाली काही उपाय सुचवत आहे ते एकीकडे चालू करा, नक्कीच तुम्हाला त्याचा फायदा होईल याची मी खात्री देतो.

दुसरा मुद्दा, आपल्या प्रत्येकामध्ये एक लहान मुल दडलेले आहे, ज्याला कधीकाळी खूप प्रेमाची गरज आणि सवय होती. पण जसजसे आपण मोठे झालो, ते मूल कुठेतरी दुर्लक्षित होत गेले. कारण जसजशा जबाबदाऱ्या वाढत गेल्या, तसतसे आपण स्वतःवर प्रेम करणे सोडून दिले. आपल्या कुटुंबासाठी कामात इतके कष्ट घेतले की, मला स्वतःला काय आवडते ते देखील विसरून गेलो. यावर उपाय म्हणजे आधी स्वतःवर प्रेम करा, मस्तपैकी कधीतरी एकटेच बाहेर फिरायला जा, जे आवडेल ते स्वतःसाठी खरेदी करा, एखाद्या चांगल्या स्पा मध्ये जा, मोठ्या सलूनमध्ये जा, तेथे फेशियल, हेड मसाज करा आणि ठरवा की महिन्यातून एक दिवस तरी स्वतःसाठी असाच मजेत घालवा. रोज सकाळी उठल्यावर आरशात बघून स्वतःला आनंदाने म्हणा, *I love you श्रीकांत आणि मी खूप निरोगी तसेच नशीबवान आहे*. बघा कसे छान वाटते तुमच्या त्या आतील लहान मुलाला! तो आनंदी झाला की तुम्ही देखील प्रत्येक दिवस आनंदात साजरा करायला सुरुवात कराल, कारण जसा तुम्ही विचार करता तसे तुमच्या आयुष्यात घडते. यालाच सेल्फ लव्ह असे म्हणतात.

वर्तमानात जगा (Live in the Moment).

भूतकाळ गेला आहे, भविष्य अजून आलेले नाही.

पण आपण बहुतेक वेळा त्याच विचारांच्या गोंधळात वर्तमान हरवतो.

खरं आयुष्य या क्षणात आहे—या श्वासात, या हसण्यात, या आनंदात.

जेव्हा तुम्ही स्वतःवर प्रेम करता आणि भूतकाळाचा भार सोडता, तेव्हाच तुम्हाला वर्तमानात जगणे जमू लागते.

लेखक: श्रीकांत शेंद्रे