होय, व्यसनमुक्ती शक्य आहे.

साधारण वयाच्या सोळा ते विसाव्या वर्षांपासून तरुण मुलांमध्ये व्यसनाची सुरुवात होते. त्यामध्ये दारू, सिगारेट, गुटखा, तंबाखू, ड्रग्ज अशी विविध व्यसनं या वयामध्ये मुले करीत असतात. कालांतराने ही व्यसनाची सवय मोठ्या प्रमाणात वाढू लागते. त्याशिवाय मी कामच करू शकत नाही अशी भावना निर्माण व्हायला सुरुवात होते. माणूस व्यसनामध्ये गुरफटून जायला लागतो. व्यसन मिळाले नाही तर ती व्यक्ती चिडचिड करण्यास सुरुवात करते. व्यसनी माणसाचा हट्टीपणा वाढायला लागतो. त्याच्या कामावर परिणाम व्हायला सुरुवात होते. खोटे बोलणे सुरू होते. आर्थिक नियोजन कोलमडते. कालांतराने व्यसनामुळे भांडणे व्हायला सुरुवात होते. नवऱ्याच्या व्यसनामुळे स्त्रियांना अनेक हालअपेष्टा सहन कराव्या लागतात. कालांतराने कुटुंब उद्ध्वस्त व्हायला सुरुवात होते. व्यसन ही वाळवी कुटुंबातील एखाद्या व्यक्तीला जरी लागली तरी सर्व कुटुंब उद्ध्वस्त व्हायला वेळ लागत नाही. व्यसनामुळे आरोग्यावर विपरीत परिणाम होतात. आळशीपणा वाढायला सुरुवात होते. रात्री उशिरापर्यंत होणारे अल्कोहोलचे व्यसन सकाळी माणसाला आळशी बनवते. विविध प्रकारचे आजार जडायला सुरुवात होते.

आपली भारतीय समाज व्यवस्था ही कुटुंब व्यवस्थेवर आधारलेली आहे. कुटुंब व्यवस्था जेवढी भक्कम तेवढा आपला मानवी समाज स्थिरावलेला असतो. परंतु गेल्या दोन ते तीन दशकांमध्ये ही कुटुंब व्यवस्थाच पोखरायला लागलेली आहे. त्याची अनेक कारणे आहेत, जसे की दुसऱ्यांशी बरोबरी करणे, पाश्चात्त्य संस्कृतीचे अनुकरण, स्वतंत्र कुटुंब व्यवस्था इ. एकत्र कुटुंब पद्धत हळू हळू लुप्त व्हायला लागली आहे. त्याचे धोके आता लक्षात यायला लागले आहेत.

- सचिन निरंतर (9850719911)